[不想每次地方書寫都heavy, 所以今次抽鬼故做輕鬆小品, 順道宣傳導賞團.]

[本來想寫二三事, 但篇幅有限, 餘下事情唯有擠到後記稍稍提及算了...]

[將刊於學生報四月號]

 

志文鬼故真人版外傳

──校園民主規劃小組

“八十年代末，新亞書院宿舍志文樓宿舍地庫111室中，住了一名電子工程系學生及一名醫科生。這兩位學生平日都係用功讀書，相處亦很和睦。一個深夜裏，該名電子工程系學生獨自在房內溫習。面對考試沉重壓力，他的情緒越來越煩亂。他終於按捺不住，決定要自殺。

他拿起平日做功課時裝嵌電路板的工具，包括銅線、電池、焊接器和……鬧鐘。他自製了一個計時自殺工具。銅線全綁在自己身上，接上電池及鬧鐘。時間到了，通電，他就被電死在床上，七孔流血，染紅了地上階磚。”（出自《中大四十年》）

「咁我可以話你知，佢唔係讀engine，佢讀soci既！」

三一五另類校史導賞團從新亞遊到本部，追溯校方文化徑不會說的事蹟，譬如百萬大道曾有四千名學生罷課反對四改三學制，或烽火台如何因學生運動而烽煙頻起。

是次導遊乃九十年代校友阿莊，路經志文樓，同學們提起上述鬼故，殊不知死者正是阿莊昔日學生會莊友，馬上來個鬼故真人版外傳，刺激更勝加鹽加醋鬼故版。

「佢讀到四年班呢，聽講因為感情問題自殺，佢自殺前留左張紙話『等著我回來』搞到佢同房好鬼驚！」

團友問：「咁佢真正自殺既方法係點呢？」

「真係用好多電線纏住，又有時間制咁，一通電就瓜左，佢係讀soci既，但佢都有咁既常識。

「呢個莊員呢，係個好火爆既人，我地上莊要pre諮，點知佢臨pre諮先話『我唔撈啦！』跟住d莊員就好憤怒啦！有無搞錯呀突然話唔撈！於是我地坐低傾啦，傾唔夠兩句就打起上黎，有個女既就同佢打啦！個自殺莊員就『黎呀黎呀？！』又唔走開喎，後來我地係要抱住兩個人拉開佢地唔好打架，因為死o個個係抬拳道既，女o個個係空手道定唔知咩，兩個都好打得既！」

後來那位自殺莊員回新亞，其他人以為勸掂數散水，誰知那位女莊員突然追上新亞找他再打過，大家發現她不見了，心知不妙，於是又衝上新亞，還要call保安：「喂你見到可疑既一男一女打架或者追住，就快d隔開佢地呀！

「好彩o個個女莊員追錯方向，我地搵到她時，其中一個莊員直情抱起佢，拖番佢落范克廉樓，係咁火爆既當時！」（一名團友問：咁抱起佢既o個個莊員咪功夫仲高囉？）

「係呀o個個都係有功夫架，我地當初一上莊已經有幾條友係實際上唔做野既，已經嗌晒架反晒面架啦，係好激烈架真係打架，唔係講笑架，d人真係好火爆！」

上莊是大一的事，自殺是大四了，阿莊想起以前學生會出迎新號當年（89年）……

「同佢打架個女仔負責出迎新號，頭先咪話一上莊就有幾條友攤左因為嗌晒架，女o個個都攤左不過係到暑假無耐先攤既，咁佢就將我地上莊幅相呢，逐個樣塗黑咁，邊個首先攤呢就塗黑先，咁第一個攤就係呢個自殺莊員囉，後來個幅相就比人話係我地個屆莊d人邊個死先死後，就係根據佢塗黑既次序死先死後喇！」

（團友問：咁你係第幾個呀？）

 

後記：環繞志文的二三事還有很多，譬如前年志文寵兒志文貓之離奇突發死亡宿生紛紛祭祀哀悼，或數年前有志文宿生因為同性戀仍受歧視，有感同志書寫乃促進運動途徑之一，於是在中大學生報公開刊登情信給同房……（署名還用了學系+真名）

若想了解更多中大地方誌，歡迎免費報名參加下次另類校史導賞團。

電：agatha/91509112 或郵： custudentplan@gmail.com

若想閱讀上期地方誌、更多導賞團資訊、參加攝影比賽、了解校園規劃與發展、促進校園民主化、歡迎加入我們（校園民主規劃小組），或至以下網址：

http://custudentplan.wordpress.com/